அன்பார்ந்த தோழர்களே,  கவிஞர் வா.மணிகண்டன் அவர்கள் சென்னை சங்கமம் நிகழ்ச்சி தொடர்பாக சவுக்குக்கு எழுதியிள்ள கடிதத்தை சவுக்கு தனது வாசகர்களுக்காக அப்படியே பிரசுரம் செய்கிறது.  கவிஞர் மணிகண்டனுக்கு சவுக்கு தனது மனமார்ந்த வாழ்த்துக்களையும் நன்றிகளையும் தெரிவித்துக் கொள்கிறது.  கவிஞன் என்றால் சுயமரியாதை வேண்டும்.  அந்த சுயமரியாதையை கருணாநிதி காலில் அடகு வைக்க கவிஞர்கள் வரிசையில் போட்டி போடுகையில், வா.மணிகண்டன், பாராட்டுக்கும் போற்றுதலுக்கும் உரியவர்.  வாழ்த்துக்கள் மணிகண்டன் அவர்களே.

நண்பர்களுக்கு,

வணக்கம்.

கடந்த சில வருடங்களாக சென்னை சங்கமத்தில் நிகழும் 'கவிதை சங்கம'த்தில் கவிதை வாசிப்பதற்காக அழைக்கப்பட்டிருக்கிறேன். தொடக்கத்தில் எனது கவிதைகளுக்கான அங்கீகாரமாகக் கருதியும் பின்னர் வந்தஆண்டுகளில் நண்பர்களைச் சந்திக்கும் நிகழ்வாகவும் தொடர்ந்து பங்களித்து வந்தேன்.

இந்த ஆண்டும் கவிதைச் சங்கமத்தில் கலந்து கொள்ளச் சொல்லி அழைப்பு வந்திருக்கிறது. என்னை நினைவில் வைத்திருந்து அழைத்த நண்பர்களுக்கு நன்றி. இந்நிகழ்விற்கு தலைமை தாங்கும் கலாப்ரியா அவர்கள் மீது எனக்கு மிகுந்த மரியாதையுண்டு. ஆனால் இந்த ஆண்டு கவிதைச் சங்கமம் நிகழ்ச்சியில் கலந்து கொள்ள எனக்கு விருப்பமில்லை.

ஸ்பெக்ட்ரம் ஊழலில் தொடர்புடையவராக சந்தேகிக்கப்பட்டு சிபிஐ-ன் விசாரணைக்குள்ளாக்கப்பட்ட ஜெகத் கஸ்பரின் தமிழ் மையம் இந்த ஆண்டும் சென்னை சங்கமத்தில் பிரதான பங்களிப்பைச் செய்கிறது. சென்னைசங்கமத்தின் இணையதளத்தில் தமிழ் மையம் பற்றி சிலாகிக்கப்பட்டிருக்கிறது. கறையின் நிழல் விழுந்த ஒரு நபருக்கும் அவரது அமைப்புக்கும் சென்னை சங்கமம் அளிக்கும் முக்கியத்துவத்தை எதிர்க்கிறேன்.எதற்காக தமிழ் மையத்திற்கும் ஜெகத் கஸ்பருக்கும் சென்னை சங்கமம் இடமளிக்கிறது என்பதனை வெளிப்படையாக அறிவிக்க வேண்டும்.

கவிஞர் கனிமொழியின் இடத்தை ஸ்திரமாக்கப்படுவதற்கு நடத்தப்படுகிறது என்பது ஒரு காரணம் என்றாலும் கலைஞர்களுக்கும் படைப்பாளிகளுக்குமான இடமாக சென்னை சங்கமம் விளங்கி வருவதாக உணர்கிறேன்.அதே சமயம் சி.பி.ஐ விசாரணைக்குப் பிறகாக தனது புனித பிம்பத்தை மறு உருவாக்கம் செய்து கொள்ள முனையும் கஸ்பருக்குத் துணையாக இந்தச் சென்னை சங்கமம் அமைந்துவிடக் கூடாது என்பதை நான்விரும்புகிறேன்.

இலக்கியமும் கலையும் சினிமா கவர்ச்சியிலும், அதிகாரத்தின் விரலசைவிலும், அரிதாரங்களினாலும் வெளிச்சம் பெறுவதில்லை. அப்படி விழக் கூடிய வெளிச்சம் தற்காலிகமானதுதான். தன் சுய நலங்களுக்காகஇலக்கியத்தையும் கலையையும் பயன்படுத்திக் கொள்பவர்களை காலத்தின் சுழல் தாட்சண்யமின்றி தூர எறிந்துவிடும்.

சுயவிளம்பரத்திற்காகவும், அரசியல் பாதுகாப்பிற்காகவும், குற்றச்சாட்டினை மறைப்பதற்காகவும், வருவாய் ஈட்டுவதற்காகவும் கலையையும், இலக்கியத்தையும் பயன்படுத்துவதற்கு எதிராக இந்த ஆண்டுநடைபெறும் கவிதைச் சங்கமத்தில் நான் கலந்து கொள்ளப் போவதில்லை.

நான்புறக்கணிப்பதனால் சென்னை சங்கமத்திற்கு எந்தவிதமான தடங்கலும் வரப்போவதில்லை; அதே சமயத்தில் எனது கவிதைகளுக்கான பிரசுர வாய்ப்புகள் குறையலாம் -எனினும் அது பற்றிய எந்தவிதமானவிசனமும் இல்லாமல் எனது எதிர்ப்பினை பதிவு செய்வதற்கான வாய்ப்பாக இதனை பயன்படுத்திக் கொள்கிறேன்.

நன்றி.

வா.மணிகண்டன்.

அன்பார்ந்த நண்பர் மணிகண்டன் அவர்களே.... உங்களுக்கான வாய்ப்பு எப்படி குறைகிறது என்று பார்க்கலாம்.  சவுக்கு தளத்தில் கவிதைகள் பிரசுரிப்பதில்லை.  அந்த விதியை தளர்த்தி, உங்கள் கவிதைகளை சவுக்கு பிரசுரிக்கத் தயாராக இருக்கிறது.  உங்கள் உள்ளத்து உணர்வுகளை வார்த்தைகளில் வடித்து, அனுப்புங்கள்.  உலகெங்கும் உள்ள நமது அன்பு உறவுகள் அதைப் படிப்பார்கள்.     சவுக்கால், உங்களது கவிதைகளுக்கு பணம் கொடுக்க இயலாத ஒரு நிலையில் உள்ளது.  அது ஒன்றுதான் குறை.  அதை நீங்கள் பொருட்படுத்த மாட்டீர்கள் என்றால், சவுக்கு தளம் உங்களை அள்ளி எடுத்துக் கொள்ள காத்திருக்கிறது தோழரே....