2010 விடுதலைச் சிறுத்தைகள் ஆண்டு என்று 2008ம் ஆண்டு தொடங்கி, தமிழகமெங்கும் விடுதலைச் சிறுத்தைகள் பிரச்சாரம் செய்து வந்தனர். இந்தத் தேர்தலில் படு தோல்வி அடைந்த பிறகு வீழ்ந்த சிறுத்தைகள் என்று பெயர் மாற்றிக்கொள்வார்களா என்று தெரியவில்லை.

ஒவ்வொரு தோல்வியிலிருந்தும் பாடத்தைக் கற்றுக் கொண்டு முன்னேறுபவன் நல்ல அரசியல்வாதியாக மட்டுமல்லாமல், நல்ல மனிதனாகவும் உருவாகும் வாய்ப்பு உண்டு. இந்த இதழ், குமுதம் ரிப்போர்ட்டர் இதழுக்கு தொல்.திருமாவளவன் அளித்த பேட்டியை பாருங்கள்.

தமிழ்த்தேசியம், தலித் விடுதலை, ஈழ விடுதலை என எல்லாத் தளங்களிலும் வேலை செய்பவர் விடுதலைச்  சிறுத்தைகள் கட்சியின் தலைவர் தொல்.திருமாவளவன்.சட்டமன்றத் தேர்தல் தோல்வியை உதறிவிட்டு தொடர்ந்து தொண்டர்களைச் சந்தித்து வருகிறார் திருமாவளவன். அவருடன் பேசியதிலிருந்து....

தேர்தலில் போட்டியிட்ட இடங்களில் எல்லாம் உங்கள் கட்சி தோற்றுப்  போயிருக்கிறது. இதற்கு என்ன  காரணம் என நினைக்கிறீர்கள்?

‘‘கூட்டணி மீது மக்கள் நம்பிக்கை கொள்ளவில்லை என்பதும், கூட்டணிக்கான ஆதரவு குறைந்ததும்  முக்கியக் காரணம். இந்தத் தேர்தல் தோல்வியில் சினிமா நடிகர்களின் பங்கு குறிப்பிடத்தகுந்தது.    எம்.ஜி.ஆர்., விஜயகாந்த், சரத்குமார் ரசிகர்கள், வெளியில் இருந்து ஆதரவளித்த விஜய், அஜீத், ரஜினிகாந்த்  ரசிகர்கள் என அவர்கள் கண்மூடித்தனமாக அ.தி.மு.க. கூட்டணியை ஆதரித்தார்கள்.’’

தி.மு.க.வின் தோல்விக்கு அவர்களது குடும்ப அரசியலும், வாரிசுகளின் ஆதிக்கமும்  முக்கிய காரணம்  என்று நினைக்கிறீர்களா?

‘‘தி.மு.க.வில் குடும்ப அரசியல் நீண்ட காலமாகவே இருந்து வருகிறது. ஸ்டாலின், அழகிரி, கனிமொழி எல்லோரும் எப்போதோ அரசியலுக்கு வந்து விட்டார்கள். ஆனாலும், இந்தத் தேர்தல் தோல்விக்கு குடும்ப  ஆதிக்கமும் ஒரு காரணம் என்பதை மறுக்க முடியாது. அதைவிட முக்கியமான காரணம் ஊடகங்கள்தான்.  2ஜி ஸ்பெக்ட்ரம் வழக்கிற்கு முன்னதாகவே தி.மு.க.விற்கு எதிரான பிரசாரங்கள் தொடங்கிவிட்டன. ஒரே  நேரத்தில் ஐந்து மாநிலங்களில் தேர்தல் நடந்தது. ஆனால், தேர்தல் அதிகாரிகள் தமிழகத்தில் மட்டும்தான்  கடுமை காட்டினார்கள். வரலாற்றில் எந்த மாநிலத்திலும், எந்தத் தேர்தலிலும் தேர்தல் ஆணையம் இப்படி  நடந்து கொண்டதில்லை.’’

 ஓட்டுக்குப் பணம் கொடுப்பது தமிழகத்தில்தான் அதிகம் இருப்பதாக தேர்தல் ஆணையம் அதற்கு காரணம்  சொல்லியதே ?

‘‘புதுச்சேரியில் காலங்காலமாக எல்லாத் தேர்தல்களிலும், எல்லா வேட்பாளர்களும் ஓட்டுக்குப் பணம், மது  கொடுப்பது வெளிப்படையாக நடக்கிறது. அங்கே இந்தக் கெடுபிடிகள் நடைபெறவில்லை. இந்தத் தேர்தலிலும் விளம்பரம் எழுதுவதிலோ, பிரசாரம் செய்வதிலோ அங்கே எந்தக் கடுமையும் காட்டப்படவில்லை.’’ 

தமிழகத்தில் மட்டும் இந்தக் கெடுபிடிகளுக்கு என்ன காரணம்? 

‘‘தமிழகத்தில் தி.மு.க.தான் இடஒதுக்கீட்டை ஆதரிக்கிற, பெரியாரிஸம் பேசுகிற, கொள்கை ரீதியாக ஈழத்தை  ஆதரிக்கிற கட்சி. இந்தியாவிலேயே மாநில உரிமைகளைப் பேசுகிற, மாநில சுயாட்சி பற்றிப் பேசுகிற ஒரே  கட்சி தி.மு.க.தான்.

இதெல்லாம் பிடிக்காதவர்கள் தி.மு.க.ஆட்சிக்கு வந்துவிடக் கூடாது என்று நீண்ட காலமாகவே ஊடகத்  தாக்குதலை ஆரம்பித்துவிட்டார்கள். ஊடகங்கள் மூலமாக, தி.மு.க.வை மக்கள் விரோதக் கட்சி, ஊழல் கட்சி என அம்பலப்படுத்தினார்கள். தி.மு.க.வினர் ஊழலே செய்யாதவர்கள் என நான் சொல்லவில்லை.  ஆனால், நாட்டில் இதற்கு முன்னரும் எத்தனையோ பெரிய ஊழல்கள் நடந்திருக்கின்றன. ஆனால்,  தி.மு.க.வை மட்டும் எதிர்ப்பதற்கு பெரிய தத்துவார்த்தப் பின்னணி இருக்கிறது. 

இதையெல்லாம் மீறி இரண்டு லட்சம் வாக்காளர்கள் உள்ள ஒரு தொகுதியில் 25 ஆயிரம் வாக்குகள்  முதல் 30 ஆயிரம் வாக்குகள் ரசிகர்களின் வாக்குகள்தான். தி.மு.க. கூட்டணி தோற்றுப் போனதற்கு  ரஜினிகாந்தும் ஒரு காரணம். ரஜினிகாந்த் அ.தி.மு.க.விற்கு வாக்களித்ததாக ஊடகங்களில் செய்திகள்  வெளியானதும், அ.தி.மு.க. ஆதரவு வாக்குகள் அதிகரித்துவிட்டது.’’

உங்கள் கூட்டணியும் பிரசாரத்தில் வடிவேலுவையும், குஷ்புவையும்தானே நம்பியிருந்தது? சினிமா  நடிகர்களை நம்பி தேர்தல் முடிவு இருப்பது ஆபத்தான போக்குதான் இல்லையா?

‘‘எம்.ஜி.ஆர்., ஜெயலலிதா, விஜயகாந்த் என சினிமா நடிகர்கள்தானே இங்கே வெற்றி பெறுகிறார்கள். இங்கே  உழைப்புக்கோ, திறமைக்கோ, தியாகத்துக்கோ, அறிவுக்கோ, ஆற்றலுக்கோ மரியாதை இல்லை. ஒரு  சினிமாக்காரன் கட்சியை ஆரம்பித்து ஆட்சியைப் பிடிக்க முடியும் என்கிற நிலைமை இந்தியாவில்  தமிழ்நாட்டில் மட்டும்தான் இருக்கிறது.’’

தி.மு.க. கூட்டணியில் இருந்து விலகி இருந்தால் வெற்றி பெற்றிருக்க முடியும் என நினைக்கிறீர்களா?

‘‘2006 தேர்தலில் நாங்கள் அ.தி.மு.க.வுடன்தான் கூட்டணி வைத்தோம். அந்தத் தேர்தலில் எங்களை  ஓரங்கட்டுவதற்கான அத்தனை வேலைகளையும் அ.தி.மு.க. செய்தது. அதிலிருந்து வெளியேறி நாங்கள்  தி.மு.க. கூட்டணியில் சேர்ந்தோம். இடையில் நாடாளுமன்றத் தேர்தல் வந்தது. ஈழப்பிரச்னை உச்சத்தில்  இருந்த நேரம் அது. அப்போது ஒரு பத்திரிகையில், ‘விடுதலைச் சிறுத்தைகளை உங்கள் கூட்டணியில்  சேர்த்துக் கொள்வீர்களா?’ என கேள்வி கேட்கிறார்கள். அதற்கு செல்வி. ஜெயலலிதா,  ‘சேர்த்துக்கொள்ள  வாய்ப்பே இல்லை’ என்று சொன்னார். 

எந்த அணியில் இருக்கிறோம் என்பதை நாங்கள் தீர்மானிப்பதை விட பெரிய கட்சிகள்தான் அதைத்  தீர்மானிக்கின்றன. 2006 தேர்தலில் நாங்கள் தி.மு.க.வில் சேர நினைத்தபோது ‘விடுதலைச் சிறுத்தைகளுக்குக்  கூட்டணியில் இடமில்லை’ என கலைஞர் சொன்னார். 2009-ல் நாங்கள் பா.ம.க., ம.தி.மு.க., தமிழ்த்தேசிய  அமைப்புகளோடு தனி அணி அமைக்க முயற்சி செய்தோம். யாரும் ஒத்துழைக்காததால், தி.மு.க.வில்  நாங்கள் தொடர வேண்டியதாயிற்று.

மறுபடியும் இந்தத் தேர்தலில் அ.தி.மு.க.விற்குப் போக வேண்டும் என்கிற எண்ணம் எங்களுக்கு எழவில்லை. அதிகாரபூர்வமான அழைப்பும் அ.தி.மு.க.விடமிருந்து வரவில்லை. கிடைத்துள்ள தோல்வியை  மனமுவந்து ஏற்றுக்கொண்டுள்ளோம்.’’

பா.ம.க., சிறுத்தைகள் கூட்டணி மூலம் வடமாவட்டங்களில் பெரிய வெற்றி கிடைக்கும் என சொல்லி வந்தீர்கள். ஆனால் முடிவு எதிர்மறையாக இருந்ததே ?

‘‘தேர்தல் முடிவுக்குப் பிறகு பா.ம.க. நிறுவனரோடு அமர்ந்து வாக்குச்சாவடி வாரியாக ஆய்வு செய்தோம்.  விடுதலைச் சிறுத்தைகளுக்கு ஓட்டு விழாத இடங்களில் நூற்றுக்கணக்கிலும், தலித் வாக்குச் சாவடிகளில் பா.ம.க.விற்கு அதிக அளவிலும் வாக்குகள் கிடைத்திருக்கிறது. இரு சமூகத்தையும் சாராதவர்கள் இதைத்  தவறாகப் பார்த்திருக்கலாம். ஆனால், எங்களுக்கு இரு தரப்பு மக்களிடமும் நல்லிணக்கம் தெரிந்தது. இரு  கொடிகளும் சேர்ந்து இருந்ததே ஒரு பெரிய மாற்றம்.’’ 

ஈழத்தையும் ஆதரித்துவிட்டு, காங்கிரஸோடு கூட்டணி என்பது உங்களுக்கே முரண்பாடாக இல்லையா?

ஈழ விஷயத்தில் காங்கிரஸுக்கு என்ன கொள்கையோ அதே கொள்கைதான் பி.ஜே.பி.க்கும், அ.தி.மு.க.விற்கும். நாங்கள் தி.மு.க. - காங்கிரஸ் கூட்டணியில் இருந்தாலும், காங்கிரஸை எந்த இடங்களில் எல்லாம் விமர்சிக்க வேண்டுமோ, அங்கெல்லாம் விமர்சித்திருக்கிறோம்.’’

தேர்தல் தோல்வி, கனிமொழி கைது விவகாரங்களுக்குப் பிறகு தி.மு.க.வோடு காங்கிரஸுக்கு நல்லுறவு இல்லை. டெல்லி செல்லும் கருணாநிதியை காங்கிரஸ் தலைவர்கள் சந்திப்பது கூட இல்லை. ஆனாலும் கூட்டணி தொடர்வதாக கருணாநிதி அறிவிக்கிறார். இது முரண்பாடாக இல்லையா?

‘‘நாங்கள் தனிப்பட்ட முறையில், காங்கிரஸ் அணியில் இருந்து தி.மு.க. வெளியேற வேண்டும் என்று தொடக்கத்தில் இருந்தே கலைஞரிடம் சொல்லி வருகிறோம். ஆனால், தி.மு.க. ஒரு சூழ்நிலைக் கைதி போல் இருக்கிறது.’’

தேசியக் கட்சிகள் மாநிலங்களில் செல்வாக்கை இழந்துவிட்ட நிலையில், அந்தக் கட்சிகளை மாநிலக் கட்சிகள் தூக்கிச் சுமக்க வேண்டிய அவசியம் என்ன ?

‘‘மத்தியில் கூட்டணியில் இருந்தால்தான் மாநிலத்தின் நலன்களைப் பாதுகாக்க முடியும் என்கிற நோக்கில் அந்தக் கட்சிகளோடு கூட்டணி வைக்க வேண்டியது அவசியமாகிறது. மற்றபடி மாநிலங்களில் தேசியக் கட்சிகள் பெரும் தேய்வைத்தான் சந்தித்து வருகிறது. அதனால் அவர்கள் அதிகாரம் செலுத்துவார்கள் என பயப்படத் தேவையில்லை.’’

சட்டமன்றத்தில் இலங்கைக்கு எதிராக தீர்மானம் நிறைவேற்றப்பட்டுள்ளது? இதனால் இலங்கைத் தமிழ் மக்களுக்கு என்ன பயன் இருக்கும் என நினைக்கிறீர்கள்?

‘‘இலங்கை அரசுக்கு எதிராக தீர்மானம் நிறைவேற்றியிருப்பதே ஒரு பெரிய மாறுதல்தான். ஆனால், இதைப்போல் பல தீர்மானங்கள் ஏற்கெனவே நிறைவேற்றப்பட்டு அது அவைக் குறிப்பில்தான் இடம் பெற்றுள்ளது. இந்திய அரசு அந்தத் தீர்மானங்கள் மீது எந்த ஒரு நடவடிக்கையும் எடுத்ததில்லை.’’

முதல்வர் ஜெயலலிதாவின் நடவடிக்கைகள் எப்படி இருக்கிறது?

‘புதிய தலைமைச் செயலகத்தைப் புறக்கணித்தது, செம்மொழிப் புத்தகங்களைத் தூக்கிப் போட்டது போன்றவை தி.மு.க.மீதான வெறுப்பை வெளிப்படுத்துவது போல்தான் செயல்பட்டு வருகிறார். சமச்சீர் கல்வி என்கிற சமூக மாற்றத்துக்கான அருமையான திட்டத்தை பெருந்தன்மையோடு நடைமுறைப் படுத்தாமல் முடக்குவது பெருந்தவறு.’’

தலைமைச் செயலகம் பற்றி பேசுவதால் இந்தக் கேள்வி. தலைமைச் செயலகம் கட்டுவதற்கு மத்திய அரசின் தாழ்த்தப்பட்டோர் நிதி பயன்படுத்தப்பட்டதாக குற்றச்சாட்டு எழுந்தது. இதை நீங்கள்தானே கேள்வி கேட்டிருக்க வேண்டும்?

காமன்வெல்த் விளையாட்டுப் போட்டிகள், தலைமைச் செயலகம் கட்டியது, தொலைக்காட்சிப் பெட்டிகள் வழங்கியது எல்லாவற்றிற்கும் தாழ்த்தப்பட்டோர் நிதி செலவிடப்பட்டதாக செய்திகள் வருகின்றன. இவை எதற்கும் இதுவரை ஆதாரங்கள் இல்லை. எந்த ஆட்சியிலும் இல்லாத அளவிற்கு தாழ்த்தப்பட்டோர் து ணைத் திட்டத்தின் கீழ் 2800 கோடி ரூபாயை தாழ்த்தப்பட்டோர் நலனுக்காக பட்ஜெட்டில் வெளிப்படையாக ஒதுக்கியது தி.மு.க. தான். மேம்போக்கான குற்றச்சாட்டுகளை கேள்வி கேட்க முடியாது’’ நிதானமாக முடிக்கிறார் திருமா.

இதுதான் திருமாவளவனின் பேட்டி….

விஜய், அஜீத், ரஜினி, சரத்குமார் ரசிகர்களின் ஆதரவால் அதிமுக ஜெயித்தது, தேர்தல் அதிகாரிகள் தமிழகத்தில் மட்டும்தான் கடுமை காட்டினார்கள், புதுச்சேரியில் காலங்காலமாக வாக்குக்கு பணம் மற்றும் மது கொடுத்து வருகிறார்கள், இது புதிதல்ல, என்பது ஒரு பகுதி.

விஜய், அஜீத், ரஜினி போன்றோர், திமுக அரசுக்கு எதிராக திரும்பியதற்கான காரணம் என்ன என்பதை திருமா ஏன் வசதியாக மறந்து விட்டார் ?   ஷுட்டிங்குக்கு போவதை விட்டு விட்டு, கருணாநிதிக்கு ஜால்ரா போடும் விழாவுக்கு கட்டாயப் படுத்தி வரவழைத்தால், வந்து கை தட்டுவதற்கு அவர்கள் என்ன திருமாவளவனா ?   புதுச்சேரியில் காலங்காலமாக வாக்குக்கு பணமும் மதுவும் கொடுத்து வருகிறார்கள், தமிழகத்தில்தான் இப்படி தேர்தல் ஆணையம் கடும் அடக்குமுறை நடந்து வருகிறது என்கிறாரே திருமா ?

காலங்காலமாக தலித்துகளை ஆலயத்துக்குள் நுழைய விடாமல், செருப்பு போட்டு நடக்கவிடாமல், சாணிப்பால் ஊற்றி கொடுமைப் படுத்திக் கொண்டுதான் இருந்தார்கள்…. இப்போதும் அது தொடர திருமா சம்மதிப்பாரா ? காலங்காலமாக நடந்து வந்தது என்பதற்காக ஒரு தவறை தொடர அனுமதிக்க முடியுமா ?

அடுத்து ஒரு கேள்விக்கு திருமா “தமிழகத்தில் தி.மு.க.தான் இடஒதுக்கீட்டை ஆதரிக்கிற, பெரியாரிஸம் பேசுகிற, கொள்கை ரீதியாக ஈழத்தை  ஆதரிக்கிற கட்சி. இந்தியாவிலேயே மாநில உரிமைகளைப் பேசுகிற, மாநில சுயாட்சி பற்றிப் பேசுகிற ஒரே  கட்சி தி.மு.க.தான்.” என்று பதிலளிக்கிறார்.

திருட்டுச் சாமியார் புட்டபர்த்தி சாய்பாபா மரணத்துக்கு இரங்கல் தெரிவித்து உயர்நிலைக் குழுவில் தீர்மானம் இயற்றுவதுதான் பெரியாரிசமா ?   இலங்கையின் ஒருமைப்பாட்டுக்கு குந்தகம் வராமல், சிங்களர்களின் மனம் புண்படாமல், ஒரு தீர்வை எட்ட வேண்டும் என்று கருணாநிதி சொன்னவரில்லையா ? சிங்களரின் மனம் புண்படாத தீர்வு என்றால், சிங்களனின் வீட்டு கக்கூசில் கூட இடம் கொடுக்க மாட்டான். அதுதான் கருணாநிதி சொன்ன தீர்வா ? மாநில உரிமைகளைப் பேசுகிற மாநில சுயாட்சியைப் பேசுகிற ஒரே கட்சி திமுகவாம் !!!!!   முல்லைப் பெரியாறையும், திருப்பதியையும், கிருஷ்ணாவையும், காவிரியையும், கச்சத்தீவையும், விட்டுக் கொடுத்து விட்டு பேடித்தனமாக கடிதம் எழுதுவதுதான் மாநில சுயாட்சியா திருமா ? உங்களுக்கு நா கூசவேயில்லையா ?

நாட்டில் எத்தனையோ ஊழல்கள் நடந்திருந்தாலும், ஊடகங்கள் அதைப் பெரிது படுத்தகின்றன என்கிறார் திருமா… எத்தனையோ ஊழல்களும், ஒரு லட்சத்து எழுபத்தாறாயிரம் கோடி ரூபாய் ஊழலும் ஒன்றா திருமா ?

அடுத்து திருமா “ஈழ விஷயத்தில் காங்கிரஸுக்கு என்ன கொள்கையோ அதே கொள்கைதான் பி.ஜே.பி.க்கும், அ.தி.மு.க.விற்கும். நாங்கள் தி.மு.க. - காங்கிரஸ் கூட்டணியில் இருந்தாலும், காங்கிரஸை எந்த இடங்களில் எல்லாம் விமர்சிக்க வேண்டுமோ, அங்கெல்லாம் விமர்சித்திருக்கிறோம்’’ என்கிறார்.

ஈழ விஷயத்தில் உங்களுக்கு என்ன கொள்கை இருந்தது திருமா ? தமிழர்களைக் கொன்ற ராஜபக்ஷேவின் எச்சில் விருந்தை உண்டு வந்ததா ?   அவன் அளித்த உணவை உண்டு விட்டு, சென்னை வந்ததும் அவனை போர்க்குற்றவாளியாக அறிவிக்க வேண்டும் என்று ஆர்ப்பாட்டம் நடத்த உங்களுக்க வெட்கமாகவேயில்லையா ? இந்தியாவால் தேடப்படும் குற்றவாளியாக அறிவிக்கப் பட்ட டக்ளஸ் தேவானந்தாவோடு தோள் மேல் கைபோட்டு உறவாடும் கலையறிந்த உங்களுக்கு என்ன கொள்கை இருந்தது, இருக்கிறது.

இறுதியாக திருமா தலைமைச் செயலகம் கட்டுவதற்கு தலித்துகளுக்கான நிதி செலவிடப் பட்டதாக வந்த செய்தி என்ற கேள்விக்கு, “காமன்வெல்த் விளையாட்டுப் போட்டிகள், தலைமைச் செயலகம் கட்டியது, தொலைக்காட்சிப் பெட்டிகள் வழங்கியது எல்லாவற்றிற்கும் தாழ்த்தப்பட்டோர் நிதி செலவிடப்பட்டதாக செய்திகள் வருகின்றன. இவை எதற்கும் இதுவரை ஆதாரங்கள் இல்லை. எந்த ஆட்சியிலும் இல்லாத அளவிற்கு தாழ்த்தப்பட்டோர் து ணைத் திட்டத்தின் கீழ் 2800 கோடி ரூபாயை தாழ்த்தப்பட்டோர் நலனுக்காக பட்ஜெட்டில் வெளிப்படையாக ஒதுக்கியது தி.மு.க. தான். மேம்போக்கான குற்றச்சாட்டுகளை கேள்வி கேட்க முடியாது”

இந்தாருங்கள் திருமா… நீங்கள் கேட்ட ஆதாரம்…

11ம் ஐந்தாண்டுத் திட்டத்தின் கீழ், ஆதி திராவிடர்களுக்கான சிறப்புக் கூறுகள் திட்டத்தில் இருந்து 74 கோடி ரூபாயை கருணாநிதி கருணையோடு, கலர் டிவி வாங்க செலவிட்டுள்ளார் என்பதற்கான ஆதாரம்.   இப்போது என்ன சொல்கிறீர்கள்… ? உடனடியாக திமுக கூட்டணியிலிருந்து வெளியேறப் போகிறீர்களா என்ன ? நீங்கள் வெளியேற மாட்டீர்கள் திருமா.

நீங்களும், உங்கள் இயக்கமும் வரலாற்றுத் தேவைகள்.   காலம் காலமாக ஒடுக்கப் பட்டுக் கிடந்த அடிமைச் சமுதயாயத்துக்கு விடிவெள்ளியாக உங்களைப் பார்த்தார்கள் தலித் மக்கள்.   சுதந்திர இந்தியாவில், தமிழகத்தில் தோன்றிய தலித் அமைப்புகள் அத்தனையும், தலித்துகளின் நலனை விட, தலைவர்களின் நலனை கருத்தில் கொண்டு செயல்பட்டு, தலித் மக்களை பெரிய கட்சிகளிடம் வாக்குகளாக அடகு வைத்து, அவர்களால் சுயலாபம் பெற்றதை மட்டுமே தமிழகம் கண்டிருக்கிறது.

ஆனால் முதன் முறையாக தேர்தலில் போட்டியிடப் போவதில்லை என்ற முழக்கத்தோடு இந்த அமைப்பைத் தொடங்கி முன்னெடுத்த உங்களை தலித் சமூகம் பெரும் நம்பிக்கையோடு பார்த்தது.   தேர்தலில் போட்டியிடுவது என்று முடிவெடுத்த பிறகு, ஜி.கே.மூப்பனாரிடம் எப்போது நீங்கள் தேர்தல் செலவுக்காக பணம் வாங்கினீர்களோ, அப்போதே நீங்கள் சறுக்கி விட்டீர்கள் திருமா.   அதற்குப் பிறகு ஒவ்வொரு தேர்தலிலும், பாட்டாளி மக்கள் கட்சி போல நீங்கள் அணி மாறியது உங்கள் ஆளுமையை வீழ்த்தவே செய்தது.   ஆனால் அணி மாற வேண்டிய நேரத்தில் அணி மாறாமல் இருந்தது உங்கள் ஆளுமையை மேலும் அதல பாதாளத்திற்கு தள்ளியது மட்டுமல்ல, நன்றாக வளர்ந்து வந்த ஒரு இயக்கத்தை மிகப் பெரிய பின்னடைவுக்கு தள்ளி விட்டீர்கள்.

நீங்கள் பேட்டியில் கூறியது போல, உங்களுக்கு அதிமுகவிடமிருந்து அதிகார பூர்வமாக அழைப்பு வரவில்லையா என்ன ? மனசாட்சியோடு பேசுங்கள் திருமா….   எத்தனை சக்திகள் உங்களை அதிமுக அணிக்கு அழைத்து வர உழைத்தார்கள் என்பது உங்களுக்கு தெரியாததா என்ன ? பல்வேறு நபர்களும், அமைப்புகளும், காவல்துறை அதிகாரிகளும், உங்களை அதிமுக அணிக்கு அழைத்து வருவதற்காக உழைத்தது சவுக்குக்கே தெரியுமா.... உங்கள் கட்சியில் உள்ள நிர்வாகிகளையே கேட்டுப் பாருங்கள்.   அதிமுகவிலிருந்து உங்களுக்கு எத்தனை முறை தூது வந்தது என்பதை மறைக்காமல் கூறுங்கள்.

உங்கள் வீழ்ச்சிக்கான காரணம் எது என்பதை நன்றாக ஆராய்ந்து பாருங்கள்.   உங்கள் கட்சி எம்.எல்.ஏ ரவிக்குமார், தனது சுயலாபத்திற்காகவும், கருணாநிதி மீது அவருக்கு இருந்த அபிமானத்திற்காகவும் உங்களை எப்படி வசியப்படுத்தி, உங்கள் சிந்தனையை முடக்கி வைத்திருந்தார் என்பதை சற்றே சிந்தித்து பாருங்கள் திருமா….   அவர், கடந்த ஆட்சிக் காலத்தில் நெடுஞ்சாலைத் துறை மற்றும், மருத்துவத் துறையில் எத்தனை ட்ரான்ஸ்பர் ஆர்டர்கள் பெற்றார் என்பதை விசாரித்துப் பாருங்கள்.  கனிமொழியோடு சேர்ந்து எத்தனை ஊழல்களில் ஈடுபட்டார் என்பதை விசாரித்துப் பாருங்கள்.   எப்படிக் குறைந்து மதிப்பிட்டாலும், இவருக்கு 50 கோடி சொத்துக்கள் இருக்கும் என்கிறார்கள் விபரம் அறிந்தவர்கள். ரவிக்குமாருக்கு உங்கள் கட்சிக்குள்ளாகவே எத்தனை எதிர்ப்பு இருக்கிறது என்பதை சற்றே விசாரித்துப் பாருங்கள். இது போல ஒரு சிலர் சம்பாதிப்பதற்காக, லட்சக்கணக்கான தொண்டர்களின் அபிலாஷைகளை அழித்து விட்டீர்களே திருமா ?

ஒரே ஒரு விஷயத்தை மட்டும் நினைவில் வையுங்கள் திருமா….. தலித் சமூகத்தை இந்த சமுதாயம் என்றுமே ஏற்றுக் கொள்ளப் போவதில்லை.   அது திமுகவாக இருந்தாலும் சரி, அதிமுகவாக இருந்தாலும் சரி.   தலித் என்பவன் தலித் தான்.   மேடையில் அமர்ந்து உங்களோடு அளவளாவுவார்கள்.   கை பிடித்து போட்டோவுக்கு போஸ் கொடுப்பார்கள். ஆனாலும், மனதில் வன்மத்தை வைத்திருப்பார்கள். உங்கள் வாக்குகளை பெற்றுக் கொண்டு, உங்களுக்கு அதிகாரம் ஒரு நாளும் வந்து விடாதபடி பார்த்துக் கொள்வார்கள்.

இதை எதிர்த்துப் போராடுவது உங்கள் கையில்தான் இருக்கிறது திருமா… உங்கள் கட்சியில் உள்ள புல்லுருவிகளையும், கட்டப்பஞ்சாயத்து செய்யும் நபர்கள் மீதும் கடும் நடவடிக்கை எடுங்கள். கட்சியை அடி மட்டத்திலிருந்து வளர்த்து எடுப்பதற்கான அனைத்து வேலைகளையும் செய்யுங்கள். அசைக்க முடியாத சக்தியாக வளருங்கள்.     அதிகாரம் உங்கள் காலடியில் வரும்.

உங்கள் மீது சவுக்குக்கு கடும் கோபம் உண்டு திருமா…..   ஈழத் தமிழருக்கு ஆதரவு கொடுத்துக் கொண்டு ஈழத் தமிழரை அழித்த காங்கிரசோடு கூட்டணி சேர்ந்ததை ஒரு நாளும் மன்னிக்க முடியாது.

ஆனாலும், ஒடுக்கப் பட்ட மக்களுக்கு இன்று வேறு நல்ல தலைவர்கள் இல்லை திருமா.   ஒடுக்கப் பட்ட மக்களுக்கு அதிகாரம் வேண்டும். அவர்கள் கைதூக்கி விடப் பட வேண்டும். இன்றும், சாவுக்கு மேளம் அடித்துக் கொண்டும், கிராமத்தில் மாட்டுத் தோலை சேகரித்துக் கொண்டும் இருக்கும் அந்த தலித் மக்களை பார்க்கையில் இவர்களுக்கு என்று விடிவு என்று ஏக்கமாக இருக்கிறது….   இவர்களை கைதூக்கி விடும் கடமை உங்களுக்கு இருக்கிறது திருமா…..   அவர்களுக்குத் தான் நீங்கள் தலைவர்.   கட்டப்பஞ்சாயத்து செய்து சம்பாதிக்கும் வன்னி அரசுக்கும், கருணாநிதிக்கு ஜால்ரா போடும் ரவிக்குமாருக்கும் அல்ல….

இந்த தேர்தல் தோல்வியை ஒரு நல்ல திருப்பமாக எடுத்துக் கொள்ளுங்கள் திருமா….   இப்போதாவது திருந்துங்கள்.